SADC inaanza mafunzo kwa waangalizi 100 wa uchaguzi nchini Tanzania.
Waangalizi watashiriki uangalizi wa uchaguzi Malawi na Seychelles.
Mafunzo yanajumuisha TEHAMA, ukusanyaji data na mwongozo wa SADC 2021.
Jaji mstaafu Dk. Fauz Twaib asema mafunzo ni muhimu kuimarisha demokrasia na utawala mwema.
DAR ES SALAAM
Jumuiya ya Maendeleo ya Kusini mwa Afrika (SADC) imeanza mafunzo kwa wadau wa uchaguzi wa Tanzania, yaliyolenga kuwawezesha kushiriki katika Misheni ya Uangalizi wa Uchaguzi ya SADC (SEOMs) katika nchi wanachama.
Mafunzo hayo, yaliyoandaliwa na Baraza la Ushauri wa Masuala ya Uchaguzi la SADC (SEAC) kwa kushirikiana na Misheni ya Uangalizi ya Uchaguzi ya SADC (SEOM) na Taasisi ya Masuala ya Uchaguzi na Demokrasia Endelevu Barani Afrika (EISA), yamewaleta pamoja maafisa wa serikali, vyombo vya ulinzi na usalama, vyombo vya habari, wadau wa vyama vya siasa, asasi za kiraia na vijana.
Mkurugenzi Msaidizi wa Idara ya Ushirikiano wa Kikanda, Wizara ya Mambo ya Nje na Ushirikiano wa Afrika Mashariki, Bi. Lilian Mukasa, amefungua rasmi mafunzo hayo katika Hoteli ya Four Points by Sheraton, jijini Dar es Salaam. Bi. Mukasa amesema waangalizi watapatiwa mafunzo ya TEHAMA na mifumo ya ukusanyaji data katika uangalizi wa uchaguzi, pamoja na mwongozo na taratibu za SADC zilizofanyiwa marekebisho mwaka 2021, pamoja na Kanuni za Maadili ya Waangalizi.
Aidha, mjumbe wa Tanzania katika SEAC, Jaji mstaafu Dk. Fauz Twaib, alisisitiza umuhimu wa kuwa na waangalizi wenye mafunzo bora ili kuimarisha demokrasia na utawala mwema ndani ya SADC yenye nchi wanachama 16. Dk. Twaib alisema kuwa mafunzo hayo ni sehemu ya juhudi za kanda kuimarisha demokrasia, huku washiriki wakitarajiwa kushiriki uangalizi katika uchaguzi wa Malawi na Seychelles mwaka huu, na si Tanzania.
Mafunzo hayo ya siku tano yanatarajiwa kuhitimishwa Agosti 24, 2025, na yanalenga kutoa ujuzi, maarifa na zana muhimu kwa waangalizi ili kuweza kufuatilia utekelezaji wa haki za kidemokrasia za wananchi katika nchi za SADC.
