MAHUNDI ATOA MWELEKEO MPYA WA UWEZESHAJI: WANUFAIKA WA MIKOPO WAFIKIA 115,000 NDANI YA MWAKA MMOJA

Na Dotto Kwilasa, Dodoma

Serikali imeendelea kupanua wigo wa uwezeshaji kiuchumi kwa wananchi kupitia vikundi vya maendeleo na mfumo wa usajili wa wafanyabiashara wadogo, hatua iliyowezesha watu 115,035 kusajiliwa tangu Februari 2024 hadi Novemba 26, 2025.

Kati yao, 44,336 tayari wamelipia vitambulisho, jambo lililowafungulia mlango wa kupata fursa za mikopo nafuu na huduma rasmi za kifedha.

Akizungumza katika mkutano wa vikundi vya malezi katika Kata ya Ihumwa jijini Dodoma, Naibu Waziri wa Maendeleo ya Jamii, Jinsia, Wanawake na Makundi Maalum, Mhandisi Maryprisca Mahundi, amesema Serikali imeongeza kasi ya kuwezesha wananchi kupitia ushirikiano wa karibu na benki za ndani na Maafisa Maendeleo ya Jamii.

Amebainisha kuwa Benki ya NMB pekee imetoa mikopo yenye thamani ya Sh bilioni 9.8 kwa wanufaika 4,810, wakiwemo wanawake 2,619, hatua inayotafsiriwa kama ishara ya mafanikio ya mpango wa vitambulisho.

Mahundi amesema kuwa jitihada hizo zinaendana na mpango mpana wa Serikali wa kuimarisha uchumi wa kaya kupitia mifuko 75 ya uwezeshaji; 63 ikiwa ya Serikali na 12 kutoka sekta binafsi.

" Mifuko hii imekuwa ikitoa mikopo, mafunzo ya ujasiriamali na nafasi za upatikanaji masoko kwa wanawake, vijana, wazee na makundi maalum tumeona fursa za mikopo ya 10% ya Halmashauri, Mfuko wa Maendeleo ya Wanawake ambao tayari umefikisha Sh bilioni 1 kwa wanawake 150, pamoja na zabuni za asilimia 30 chini ya Sheria ya Ununuzi wa Umma (2023) zinazotengwa kwa makundi maalum, "ameswna.

Ameeleza kuhusu fursa za mikopo maalum zinazotolewa na benki mbalimbali ikiwemo Mwanamke Hodari ya Azania Bank, Impeju ya CRDB isiyo na riba, na mkopo wa Jasiri wa NMB unaotolewa kwa riba ya asilimia 14 kwa wanawake wamiliki wa biashara na asilimia 9 kwa miradi ya kilimo.

Pia ametaja programu ya iSOKO inayotekelezwa kwa ushirikiano kati ya Wizara na TWCC, akibainisha kuwa imekuwa daraja muhimu la kuwaunganisha wanawake na masoko ya ndani na kimataifa kwa njia ya kidijitali.

Akimulika upande wa ustawi wa jamii, Mahundi amewataka wanachama wa vikundi na jamii kwa ujumla kuendeleza mijadala kuhusu malezi bora ili kuhakikisha msingi wa familia unakuwa imara.

Amesema changamoto za ukatili wa mtandaoni, matumizi holela ya TEHAMA na ukosefu wa mawasiliano ndani ya familia zimeendelea kuwaathiri watoto na vijana, hivyo kuhitaji ushirikiano wa wadau wote katika kukabiliana nazo.

"Serikali itaendelea kushirikiana na vikundi hivi bega kwa bega katika utoaji wa elimu, uhamasishaji na mafunzo yanayolenga kuimarisha ustawi wa jamii na kukuza uchumi wa kaya, " amesisitiza