WATUMISHI KISHAPU WAPATIWA ELIMU YA FEDHA NA AFYA YA AKILI

Mwezeshaji wa mada ya kwanza iliyohusu uwekezaji,Afisa Uendeshaji kutoka UTT AMIS tawi la Kahama Mgreth Tesha akizungumzia uwekezaji wa vipande na faida zake kupitia UTT AMIS

Na Sumai Salum-Kishapu

Watumishi wa Makao Makuu wa Halmashauri ya Wilaya ya Kishapu mkoani Shinyanga wamepewa mafunzo maalum kuhusu umuhimu wa uwekezaji, maandalizi ya kustaafu na afya ya akili, lengo likiwa ni kuwajengea uwezo wa kujiandaa mapema kwa maisha ya baada ya utumishi pamoja na kuboresha ustawi wao kazini.

Akitoa mada kuhusu maandalizi ya kustaafu na uwekezaji Novemba 20,2025 Ukumbi wa Halmashauri ,Mkurugenzi wa Affluence Training Limited kutoka Dar es Salaam, Dr. Staphord Kwanawa, amesema watumishi wengi nchini hukumbana na changamoto ya msongo wa mawazo mara wanapokaribia kustaafu kutokana na kutokuwa na maandalizi ya kutosha.

“Kustaafu ni hatua ya lazima kwa kila mtumishi, lakini wengi huchelewa kujiandaa. Mara nyingi mtu hukumbuka kuweka akiba akiwa amebakisha mwaka mmoja au miezi michache kabla ya kustaafu,” amesema Dr. Kwanawa.

Ameongeza kuwa hali hiyo hupelekea mstaafu kutumia pensheni yake kulipia mahitaji mengi yanayomkabili kwa wakati mmoja, ikiwemo kujenga nyumba ya kuishi, kugharamia masomo ya watoto, pamoja na kuanzisha biashara ya kumsaidia katika maisha ya baadaye.

Mwezeshaji wa mada ya Uwekezaji na Mkurugenzi wa Affluence Training Limited kutoka Dar es Salaam, Dr. Staphord Kwanawa akielezea kuhusu maandalizi kabla ya kustaafu na namna ya kuandaa mazingira mazuri ya utunzaji akiba

Ametoa rai kwa watumishi kuanza kuweka akiba mapema, kuwekeza kwenye miradi yenye faida na kuandaa mpango binafsi wa kustaafu ili kuepuka msongo wa mawazo unaosababisha baadhi ya wastaafu kuugua au hata kupoteza maisha.

Kwa upande wake, Afisa Uendeshaji kutoka UTT AMIS, Magreth Tesha, ametoa elimu kuhusu umuhimu wa nidhamu ya fedha na uwekezaji kupitia mifuko ya UTT, akibainisha kwamba mifuko hiyo ni salama na yenye faida kwa watumishi wanaotaka kujiimarisha kiuchumi.

“Mtu akifungua akaunti UTT anapata fursa ya kuwekeza fedha zake sehemu salama na yenye kuleta faida. Huu ni uwekezaji rahisi unaoweza kumpa mtu uhakika wa maisha bora baada ya kustaafu,” ameongeza Tesha.

Mwezeshaji wa mada ya afya ya akili Dr. Pascal D. Kang'iria akielezea tabia za mtu mwenye matatizo ya afya ya akili

Sambamba na mafunzo hayo, watumishi walipata elimu kuhusu Afya ya Akili iliyotolewa na Dr. Pascal D. Kang’iria, ambaye amesisitiza umuhimu wa kujipenda na kujijali kama msingi wa kuimarisha mahusiano kazini na katika jamii.

“Afya ya akili ni uwezo wa kujikubali, kuwakubali wengine, kuchukuliana na hisia pamoja na kukabiliana na changamoto zinazojitokeza. Mtu anapojipenda, anaongeza uwezo wa kufanya kazi kwa ufanisi, kuwa na amani ya ndani na kushirikiana vizuri na wenzake,” amesisitiza Dr. Kang’iria.

Hata hivyo mnamo Novemba 21,2025 mafunzo hayo yamefanyika kwa kundi la watumishi wa maeneo mengine ya Kata 29 za Wilaya hiyo yakifanyika kwenye ukumbi wa Shule ya Msingi Mlimani.

Mratibu wa elimu ya afya kwa umma mkoa wa Shinyanga Moses Mwita

Akizungumza wakati akitoa shukrani kwa Mkurugenzi wa Kishapu kwa uwa na utayari kupokea jambo hilo lililoratibiwa na Ofisi ya Mkuu wa Mkoa kupitia idara ya afya Mratibu wa elimu ya afya kwa umma mkoa wa Shinyanga Moses Mwita amesema lengo hasa kutaka watumishi kuwa sawa kiakili ili wafanye kazi vizuri.

Mafunzo hayo yamepokelewa kwa ari kubwa na watumishi, ambao wameeleza kuwa elimu waliyoipata itawasaidia kuboresha maisha yao ya sasa na ya baada ya utumishi.