WAZIRI HOMERA AWAHAKIKISHIA WANANCHI WA NAMTUMBO MAGEUZI YA KILIMO NA ELIMU

Waziri wa Katiba na Sheria na Mbunge wa Jimbo la Namtumbo daktari Juma Zuberi Homera akizungumza na wananchi wa Jimbo la Namtumbo baada ya kuwasili leo tarehe 28 Novemba baada ya kukabidhiwa dhamana ya kuwa Waziri na Rais Dkt Samia Suluhu Hassan

Na Regina Ndumbaro Namtumbo-Ruvuma

Waziri wa Katiba na Sheria ambaye pia ni Mbunge wa Jimbo la Namtumbo, Dkt. Juma Zuberi Homera, ame wasili jimboni kwake kwa mara ya kwanza tangu kuteuliwa na Rais wa Jamhuri ya Muungano wa Tanzania Dkt Samia Suluhu Hassan kushika wadhifa huo, na kupokelewa kwa hamasa na wananchi.

Akiwa katika ziara hiyo, Dkt. Homera amewahakikishia wakazi wa Namtumbo kuwa ataendelea kushirikiana nao kuboresha ustawi wa jimbo hilo, hasa kupitia sekta ya kilimo ambayo ndiyo nguzo kuu ya uchumi wa maeneo mengi ya vijijini.

Akiongea na wananchi, Waziri Homera ameeleza mpango wake wa kuwasaidia wakulima kupata pembejeo pamoja na kuwalimia mashamba hekari tano kwa makundi mbalimbali ikiwemo vijana, wanawake, wazee na wanachama wa CCM katika matawi na kata.

Amesema hatua hiyo inalenga kuinua uzalishaji na kuongeza kipato cha wananchi, hivyo kuboresha uchumi wa kaya na maendeleo ya jimbo kwa ujumla.

Katika sekta ya elimu, Dkt. Homera amebainisha kuwa ataendelea kushirikiana na serikali kuimarisha miundombinu ya shule na kuhakikisha kiwango cha ufaulu kinaongezeka.

Amewataka wazazi na walezi kutimiza wajibu wao wa kuhakikisha watoto wanapata elimu bora, kwani fursa nyingi za ajira zinazokuja zitahitaji watu wenye ujuzi na elimu ya kutosha.

Homera amewataka wazee na viongozi wa jamii kuendelea kudumisha umoja na mshikamano ili kufanikisha malengo ya maendeleo ya jimbo hilo.

Waziri Homera amewaomba vijana kujiepusha na vitendo vinavyoweza kuhatarisha amani, akisisitiza kuwa maendeleo yanawezekana tu ikiwa amani na utulivu vitadumishwa katika maeneo yote ya Namtumbo.